فن وثقافة

نضال الشافعي: فرحتي لا توصف بنجاح زنزانة 7.. وهذه رسالتي لأحمد زاهر

 

أبدى الفنان المصري نضال الشافعي، سعادته بردود أفعال الجمهور على فيلمه الجديد “زنزانة 7” الذي يشارك في بطولته إلى جانب النجم أحمد زاهر، وتم طرحه في دور العرض منذ أسابيع.

وقال الشافعي في لقاء خاص مع موقع “فوشيا”: “الحمد لله ردود الأفعال كانت أكتر من هايلة، سعيد بيها جدًا وسعيد بالنجاح اللي حصل رغم الظروف الصعبة في فيلم زنزانة 7، في ظل أزمة الكورونا وحضور 25 % فقط من الجمهور في السينما، وتفاصيل كتيرة”.

وأضاف: “إنما النجاح ده ناتج عن حب الناس وتوفيق ربنا قبل أي شيء، وإلى حد ما في جودة حلوة في الفيلم تجعل الناس تثق فينا وإنها تنزل”.

وتابع الشافعي: “فرحتي الشديدة بإن الفكرة اللي كانت في دماغي ربنا رزقني بيها واتحققت، بإني أنا وأحمد زاهر نحط إيدينا في إيد بعض ونقف جنب بعض علشان نطلع عمل ويلقى هذا النجاح، أعتقد دي فرحة كبيرة جدًا”.

وأردف الفنان المصري: “من خلال فوشيا ببارك لأحمد زاهر ودعواتي ليه إن ربنا يكرمه، وإن إحنا نجحنا سوا دي فرحة متتوصفش”.

واستطرد: “دي حاجة بتفائل بيها إني أشتغل مع أصحابي، أحمد زاهر في زنزانة 7، وأحمد رزق في مسلسل (في يوم وليلة)، اللي هيكون مع مخرجة كبيرة زي شيرين عادل، أعتقد إن العمل ده هيبقى مختلف بإذن الله”.

واختتم: “الورق مكتوب بشكل هايل، الدور حلو وفي صداقة بتربطني بأحمد رزق في المسلسل، أنا طالع بدور (يحيى) وفي قصص حب وتفاصيل جوة العمل حلوة إن شاء الله”.

وكان نضال الشافعي قد تحدث في وقت سابق لـ”فوشيا” عن أزمة فيروس كورونا، قائلًا: “كويس إننا واقفين قدام بعض دلوقتي.. كورونا ظرف صعب جدًا وأتمنى لكل الناس إن ربنا يحفظهم ويحميهم ويبعد أي شر عن أهاليهم.. دايمًا في حالة الخوف والقلق على نفسك وأهلك وبلدك”.

وأكمل: “دايمًا بمشي بالكمامة والكحول، بقوا شيء أساسي موجودين في العربية.. والمسافات بيني وبين الي قدامي زي ما بتقول فكرة التباعد الاجتماعي”.

واستطرد الفنان المصري: “دايما وقت الحظر كنت بقول العلاقات البشرية هتختلف تمامًا ما قبل الكورونا وما بعد الكورونا، خلاص بقى في نظام، حتى الناس في الشارع لما تيجي تتعاملي معاهم بيبقي في ود وحب بس الي واقف قدامك بيبقى مقدر إنك مش هتقدري تسلمي عليه، خلاص مبقاش فيه البوس والأحضان والطبطبة، لإن كل واحد بقى خايف على التاني أكتر ما هو خايف على نفسه”.

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى